Mae Cyngor Sir Fynwy wedi dathlu cwblhau’r gwaith gwella yng Ngerddi Linda Vista yn y Fenni a llwyddiant ennill Gwobr y Faner Werdd.
Nododd y digwyddiad, a gynhaliwyd ar 13 Awst 2026, gwblhau prosiect Pethau Pwysig a ariennir gan Lywodraeth Cymru, sydd wedi dod â buddsoddiad i un o barciau a gerddi mwyaf annwyl y Fenni.
Mae’r prosiect wedi adfer golygfeydd ar draws Dôl y Castell tuag at y Blorenge a’r Ysgyryd Fach, wedi creu ardaloedd plannu newydd, ac wedi cyflwyno paneli dehongli i helpu ymwelwyr i archwilio hanes, coed a thirwedd y gerddi.
Mae cynllun cadwraeth newydd hefyd wedi’i ddatblygu i gefnogi gwarchod Gerddi Linda Vista yn y tymor hir, gydag ymchwil yn datgelu gwybodaeth newydd am gyn-berchnogion Linda Vista House a’r gerddi.
Mae Gwobr y Faner Werdd yn cydnabod parciau a mannau gwyrdd a reolir yn dda ac fe’i hystyrir fel y meincnod ansawdd rhyngwladol ar gyfer mannau awyr agored hamdden.
Ffactor allweddol wrth gael y wobr oedd y bartneriaeth gref rhwng Cyngor Sir Fynwy, Cyfeillion Gerddi Linda Vista, Cyngor Tref y Fenni a rhanddeiliaid eraill.
Mae Cyfeillion Gerddi Linda Vista wedi chwarae rhan hanfodol wrth ofalu am y gerddi trwy eu hymroddiad, eu cefnogaeth ymarferol a’u heiriolaeth, gan helpu i sicrhau bod y safle’n parhau i fod yn fan gwyrdd croesawgar a phoblogaidd yng nghanol y gymuned.
Dywedodd Aelod Cabinet Cyngor Sir Fynwy dros Newid yn yr Hinsawdd a’r Amgylchedd, y Cynghorydd Catrin Maby: “Mae Gerddi Linda Vista yn lle arbennig i’r Fenni, ac mae’r gydnabyddiaeth hon yn deyrnged i bawb sydd wedi helpu i ofalu amdanynt dros nifer o flynyddoedd. Hoffwn ddiolch yn arbennig i Gyfeillion Gerddi Linda Vista, ochr yn ochr â’n partneriaid a’n rhanddeiliaid, y mae eu hymrwymiad a’u gwaith caled wedi gwneud gwahaniaeth mor bwysig.
“Mae Gwobr y Faner Werdd yn adlewyrchu cryfder gweithio mewn partneriaeth ac yn cydnabod yr ymdrech ar y cyd sy’n mynd i warchod a gwella’r gofod hardd hwn i drigolion, ymwelwyr a bywyd gwyllt.”
Daeth y dathliad â gwirfoddolwyr, contractwyr, staff y cyngor a phartneriaid prosiect a gyfrannodd at y gwaith gwella ynghyd.
Codwyd y Faner Werdd gan Owen Derbyshire, Prif Weithredwr Cadwch Gymru’n Daclus, yng nghwmni gwirfoddolwyr, cynghorwyr tref a chymuned, staff y tir a gwahoddedigion.
