Cyn hir, bydd teuluoedd ar draws Sir Fynwy yn gallu gwneud cais am ofal plant wedi’i ariannu ar gyfer pob plentyn dwy flwydd oed, yn dilyn yr ehangiad diweddaraf i gynnig gofal plant wedi’i ariannu Llywodraeth Cymru.

O 2 Tachwedd 2026 ymlaen, bydd rhieni a gofalwyr plant dwy flwydd oed yn gymwys i gael hyd at 12.5 awr o ofal plant wedi’i ariannu bob wythnos, o’r tymor ar ôl eu pen-blwydd yn ddwy flwydd oed, hyd nes y tymor ar ôl eu pen-blwydd yn dair oed, waeth ble maen nhw’n byw yn Sir Fynwy.

Mae’r gefnogaeth yn cael ei chyflwyno yn rhan o gynlluniau Llywodraeth Cymru i estyn gofal plant wedi’i ariannu allan i blant dwy flwydd oed ledled Cymru. Ei nod yw helpu teuluoedd gyda chostau gofal plant, cefnogi datblygiad cynnar plant, a chryfhau’r ddarpariaeth ofal plant leol.

Mae Cyngor Sir Fynwy wedi croesawu’r cyhoeddiad, a fydd yn rhoi mynediad i fwy o deuluoedd at ofal plant fforddiadwy, o ansawdd uchel yn agos at gartref.

Meddai’r Cynghorydd Laura Wright, Aelod Cabinet Cyngor Sir Fynwy dros Addysg: “Mae hyn yn newyddion i’w groesawu i deuluoedd ar draws Sir Fynwy. Bydd estyn gofal plant a ariennir allan i bob plentyn dwy flwydd oed yn gwneud gwahaniaeth go iawn trwy roi mwy o gefnogaeth i rieni a gofalwyr, a helpu plant i elwa ar ddysgu cynnar a chwarae mewn lleoliad diogel sy’n eu meithrin.

“Rydyn ni’n gwybod y gall mynediad at ofal plant fforddiadwy, o ansawdd uchel, gael effaith gadarnhaol ar fywyd y teulu. Bydd yr ehangiad hwn yn helpu i sicrhau bod mwy o blant yn Sir Fynwy yn cael y dechrau gorau posibl, a hefyd yn cefnogi ein darparwyr gofal plant lleol.”

Meddai Dirprwy Brif Weinidog Cymru, Sioned Williams: “Mae’r buddsoddiad hwn yn dangos ein bod yn cyflymu ein hymrwymiadau i deuluoedd Cymru. Costau gofal plant Cymru yw’r uchaf yn y DU ac rwy’n benderfynol o helpu teuluoedd ar draws Cymru, a chefnogi datblygiad plant ar yr un pryd.

“Byddwn yn parhau i weithio’n agos gydag awdurdodau lleol ar draws Cymru i estyn hyn allan ym mhobman.” Rhagor o wybodaeth am y cynnig hwn – https://www.monmouthshire.gov.uk/cy/gwasanaeth-gwybodaeth-ir-teulu-ar-cynnig-gofal-plant/