Mae Cyngor Sir Fynwy yn gwahodd trigolion, busnesau a grwpiau cymunedol i helpu i ddylanwadu ar gam nesaf y cynlluniau ar gyfer canol tref Cil-y-coed a’r mannau cyhoeddus o’i amgylch.

O ddydd Llun, 21 Medi, bydd cam diweddaraf Sgwrsio Am… gynllun creu lleoedd Gwella Cil-y-coed ar agor ar gyfer ymgynghoriad. Gall pobl leol edrych ar gyfres o gynigion a ddatblygwyd mewn ymateb i adborth a gasglwyd yn ystod cam cyntaf yr ymgysylltu ym mis Mehefin 2026 a chynnig sylwadau.

Bydd y Cyngor hefyd yn cynnal sesiwn ymgynghori wyneb yn wyneb rhwng 10am a 6pm ddydd Mawrth, 22 Medi, yn yr ardal sydd ar gau i gerbydau yng nghanol y dref. Bydd cyfle i drigolion weld y cynigion, siarad â chynrychiolwyr y prosiect a rhannu eu barn wyneb yn wyneb.

Mae’r ymgynghoriad ar y gweill tan ddydd Sul, 11 Hydref 2026. I gymryd rhan, ewch i www.letstalkmonmouthshire.co.uk/enhancing-caldicot.
Mae copïau papur o’r cynigion a’r holiadur hefyd ar gael o swyddfeydd Cyngor Tref Cil-y-coed a’r hyb cymunedol.

Yn ystod cam cyntaf yr ymgysylltiad, tynnodd trigolion sylw at flaenoriaethau gan gynnwys cefnogi busnesau lleol, creu canol tref mwy diogel a chroesawgar, gwella lleoedd a chryfhau cysylltiadau cerdded ac olwynion.

Meddai’r Cynghorydd Paul Griffiths, Aelod Cabinet dros Gynllunio a Datblygu Economaidd a’r Dirprwy Arweinydd: “Mae adborth gan drigolion, busnesau a rhanddeiliaid wedi dylanwadu ar y cynigion yn yr ail gam hwn.

“Dywedodd pobl wrthym eu bod eisiau canol tref bywiog, hygyrch a chroesawgar sy’n cefnogi busnesau lleol, yn dathlu hunaniaeth Cil-y-coed ac yn hawdd symud o’i gwmpas. Rydyn ni wedi gwrando ac wedi datblygu cynigion sy’n adlewyrchu’r blaenoriaethau hynny.

Byddwn yn annog pawb sydd â diddordeb yn nyfodol Cil-y-coed i edrych ar y cynlluniau a rhannu eu barn. Bydd eich adborth yn helpu i lunio’r cynllun creu lleoedd terfynol a chefnogi buddsoddiad yn y dref yn y dyfodol.” Rwy’n annog pawb i edrych ar y cynlluniau a rhannu eu barn. Bydd eich adborth yn helpu i lunio’r cynllun creu lleoedd terfynol a’r buddsoddiad yn y dref yn y dyfodol.”

Ychwanegodd Maxine Mitchell, Dirprwy Faer CTC a Chadeirydd y  Grŵp Partneriaeth Creu Lle: “Mae Cyngor Tref Cil-y-coed yn parhau i weithio i wella’n Tref i’n trigolion i gyd.  Rydym wedi cael ein hannog yn fawr gan syniadau a sylwadau trigolion a’r amser y maen nhw wedi treulio’n rhoi barn adeiladol. 

“Gan weithio gyda Chyngor Sir Fynwy, rydym yn dechrau cael lle gwell i ni i gyd fyw ynddo a’i fwynhau.  Mae dechrau’r gwelliannau wedi cael eu croesawu a’u gwerthfawrogi.”