Daeth disgyblion o bob rhan o Sir Fynwy at ei gilydd i arddangos eu creadigrwydd, gwaith tîm a’u sgiliau codio mewn digwyddiad LEGO STEM deinamig a gynhaliwyd yn Ysgol Cil-y-coed ddydd Iau, 18 Mehefin 2026.

Trefnwyd y digwyddiad gan raglen STEM Cyngor Sir Fynwy, ac roedd yn cynnig cyfle i ddysgwyr brofi cystadleuaeth debyg i Gynghrair LEGO mewn amgylchedd difyr a chefnogol, heb fawr o straen.

Trwy gydol y dydd, fe fu timau’n cymryd rhan mewn amrywiaeth o heriau ymarferol a gynlluniwyd i brofi eu sgiliau datrys problemau, peirianneg a rhaglennu. Roedd y gweithgareddau’n cynnwys heriau codio wedi’u hamseru â sylfaen mat, heriau ymarferol gan ddefnyddio synwyryddion, ac yn benllanw ar y digwyddiad “Ras Hoper” yn llawn egni, lle bu’r timau’n cystadlu i adeiladu’r dyluniad a oedd yn symud gyflymaf.

Anogodd y digwyddiad ddysgwyr i gymhwyso’u gwybodaeth STEM mewn cyd-destun o’r byd go iawn, gan helpu i fagu hyder a gwytnwch a chydweithio. Cafodd yr holl gyfranogwyr gydnabyddiaeth am eu hymdrechion, gyda thystysgrifau a bathodynnau i ddathlu eu cyflawniadau ar ddiwedd y dydd.

Yn ogystal â datblygu sgiliau technegol, nod y digwyddiad oedd ysbrydoli chwilfrydedd a brwdfrydedd dros wyddoniaeth, technoleg, peirianneg a mathemateg, a dod ag ysgolion at ei gilydd i rannu’r dysgu a dathlu llwyddiant.

Mae effaith y gwaith hwn yn cael ei weld yn barod tu hwnt i’r sir. Yn dilyn eu buddugoliaeth ranbarthol yn Sain Ffagan, cynrychiolodd disgyblion o Ysgol Gynradd Cross Ash ranbarth De Cymru yn ddiweddar yn Rowndiau Terfynol cynghrair gyntaf Lego League UK yn Harrogate, lle cawsant eu coroni fel y tîm uchaf ei berfformiad o Gymru yn y categori gêm robot. Trwy ddefnyddio pecynnau LEGO Spike Prime a thechnoleg argraffu 3D a gafwyd trwy gyllid Llywodraeth Cymru, datblygodd y tîm sgerbwd allanol amddiffynnol arloesol i helpu i ddiogelu arteffactau archeolegol bregus wrth eu cludo, cyn mynd ymlaen i orffen yn drydydd yn y twrnamaint terfynol ar ôl cystadlu yn erbyn timau o Ffrainc a Brasil.

Meddai Aelod Cabinet Cyngor Sir Fynwy dros Addysg, y Cynghorydd Laura Wright: “Mae digwyddiadau fel hyn yn chwarae rhan bwysig wrth ysbrydoli pobl ifanc i archwilio gwyddoniaeth, technoleg, peirianneg a mathemateg mewn ffordd ymarferol a difyr. Trwy ddod â dysgu yn fyw trwy greadigrwydd, gwaith tîm a datrys problemau, mae disgyblion yn gallu magu hyder a datblygu sgiliau a fydd yn eu cefnogi yn y dyfodol.”

Hoffai’r Cyngor ddiolch i staff Ysgol Cil-y-coed am gynnal y digwyddiad a helpu i’w gyflwyno, yn ogystal â’r holl ysgolion a dysgwyr a gymerodd ran. Am ragor o wybodaeth am raglen STEM Cyngor Sir Fynwy, ewch i: Rhaglen STEM – Sir Fynwy