Yn dilyn ymgynghoriad cyhoeddus a phroses wleidyddol, cyhoeddodd Cyngor Sir Fynwy newidiadau i’w Bolisi Cludiant rhwng y Cartref a’r Ysgol ym mis Medi 2024. Yn unol â’i ddyletswyddau statudol, cyhoeddwyd y newidiadau polisi erbyn 1af Hydref 2024 er mwyn dod i rym ar ddechrau blwyddyn academaidd 2025/26.

Gwnaed y penderfyniad yn dilyn ymgynghoriad cyhoeddus rhwng 12fed Gorffennaf 2024 a’r 23ain Awst 2024. Hyrwyddwyd yr ymgynghoriad trwy wefan y cyngor, sianeli cyfryngau cymdeithasol a thrwy ddatganiad i’r wasg. Yn ogystal, cysylltodd y tîm Cludiant Ysgol â phob dysgwr a dderbyniodd gludiant rhwng y cartref a’r ysgol ar y pryd i’w hysbysu am yr ymgynghoriad.

Dilynodd y broses i ddiwygio’r polisi weithdrefn y cyngor, a oedd yn cynnwys ystyriaeth yn y Pwyllgor Craffu Pobl ar 17eg Gorffennaf 2024 ac ystyriaeth bellach gan yr un Pwyllgor ar 19eg Medi 2024. Cymeradwyodd y cabinet newidiadau i’r pellteroedd statudol ar gyfer cludiant ysgol ar 25ain Medi 2024.

Mae darpariaeth bresennol Cyngor Sir Fynwy rhwng y cartref a’r ysgol yn sylweddol uwch na’i ddyletswydd gyfreithiol, ac mae cost darparu’r gwasanaeth wedi parhau i gynyddu flwyddyn ar ôl blwyddyn oherwydd cynnydd yn y galw a chostau gweithredwyr. Roedd gweithredu’r newidiadau hyn yn rhan o fesur arbed costau a fyddai’n cyd-fynd â’r Cyngor â’i ddyletswyddau statudol a nodir yn y Mesurau Teithio Dysgwyr (Cymru).

Mae’r Cyngor yn asesu llwybrau cerdded ar gyfer dysgwyr sy’n byw o fewn dwy filltir (cynradd) a thair milltir (uwchradd) i’w hysgol drwy gydol y flwyddyn. Mae hyn er mwyn sicrhau bod gan bob dysgwr o fewn y pellteroedd hyn opsiwn hyfyw i gerdded i’r ysgol ac yn ôl. Y llwybrau a nodwyd yw’r opsiynau mwyaf uniongyrchol sydd ar gael i ddysgwyr ac fe’u hasesir yn unol â’r Mesur Teithio Dysgwyr a chanllawiau asesu Diogelwch Ffyrdd Prydain Fawr.

Dywedodd Arweinydd Cyngor Sir Fynwy, y Cynghorydd Mary Ann Brocklesby: “Mae’r Cyngor yn un o’r olaf yng Nghymru i fynd y tu hwnt i’r pellteroedd cludiant o’r cartref i’r ysgol sy’n ofynnol gan y gyfraith. Drwy ddychwelyd i’r pellteroedd statudol, rydym wedi gallu ailgyfeirio’r arian hwn i’n hysgolion i gefnogi addysg i’n holl ddysgwyr. Mewn gwirionedd, pe bai gennym y cyllid, ni fyddem wedi gwneud hyn; fodd bynnag, mae’n ganlyniad i gyfnod parhaus o fethu derbyn arian digonol ar gyfer ein gwasanaethau cyhoeddus. Am y tair blynedd diwethaf yn olynol, rydym wedi wynebu pwysau cost blynyddol cynyddol o dros £20m. Dyna 10% o’n cyllideb, flwyddyn ar ôl blwyddyn.”

Mae Polisi Cludiant rhwng y Cartref a’r Ysgol y Cyngor yn cael ei adolygu’n flynyddol a’i gyhoeddi ar ei wefan. Bydd y polisi’n aros yr un fath ar gyfer blwyddyn academaidd 2026/27.

I darganfod mwy am cludiant rhwng cartref a’r ysgol ewch i: www.monmouthshire.gov.uk/cy/bysiau-ysgol/