Hydref 10 yw Diwrnod Iechyd Meddwl y Byd, ond mae’n bwnc sy’n berthnasol bob dydd – mae’n effeithio ar gymaint ohonom, gartref ac yn y gweithle.

Heddiw, mae Cyngor Sir Fynwy wedi cryfhau ei ymrwymiad i iechyd meddwl a lles ymhlith ei weithlu drwy lofnodi Siarter Gweithlu Melo MHWB 2026, addewid Gwent gyfan i hyrwyddo lles, annog sgyrsiau agored a helpu i atal hunanladdiad.

Mae’r Siarter newydd, a lansiwyd gan Dîm Iechyd Cyhoeddus Gwent ym Mwrdd Iechyd Prifysgol Aneurin Bevan, wedi’i chynllunio i helpu sefydliadau ledled Gwent i gryfhau eu dull o ymdrin ag iechyd meddwl, lles ac atal hunanladdiad.

Trwy lofnodi’r siarter, mae’r cyngor wedi ymrwymo i godi ymwybyddiaeth o wefan ac adnoddau lles BIPAB Melo, hyrwyddo hyfforddiant ymwybyddiaeth o iechyd meddwl a hunanladdiad am ddim, a rhannu gwybodaeth a chefnogaeth ymarferol trwy ei sianeli cyfathrebu.

Llofnodwyd y Siarter gan y Cyng. Ben Callard, Aelod Cabinet Cyngor Sir Fynwy dros Adnoddau, a ddywedodd: “Rydym yn falch iawn o lofnodi Siarter Iechyd Meddwl a Lles Melo. Mae cefnogi lles ein gweithwyr a’n cymunedau wrth wraidd ein gwerthoedd. Mae ymrwymo i’r Siarter yn adeiladu ar y gwaith yr ydym eisoes yn ei wneud ac yn cryfhau ein hagwedd at iechyd meddwl, lles ac atal hunanladdiad.

“Weithiau gall cael sgwrs, cael mynediad hawdd at wybodaeth neu wybod ble i droi wneud gwahaniaeth gwirioneddol. Rydyn ni eisiau atgoffa ein cydweithwyr a’n preswylwyr bod siarad am iechyd meddwl yn normal, bod cefnogaeth ar gael, a does neb yn teimlo bod yn rhaid iddyn nhw wynebu heriau ar eu pen eu hunain.”

Dywedodd yr Athro Tracy Daszkiewicz, Cyfarwyddwr Gweithredol Iechyd Cyhoeddus, Bwrdd Iechyd Prifysgol Aneurin Bevan: “Rydym wrth ein bodd bod Cyngor Sir Fynwy wedi llofnodi Siarter Melo. Mae’r Cyngor wedi chwarae rhan bwysig wrth ein helpu i ddatblygu’r fenter newydd hon, ac mae hwn yn gam gwych i ddangos eu hymrwymiad i les eu staff a’u cymunedau.

“Mae’r Siarter yn darparu ffordd ymarferol i sefydliadau gefnogi iechyd meddwl a lles pobl ledled Gwent, gan annog sgyrsiau am iechyd meddwl, a hyrwyddo adnoddau fel gwefan Melo Tîm Iechyd Cyhoeddus Gwent a chyrsiau hyfforddi am ddim.”

Mae’r siarter yn cydnabod y gall pawb chwarae rhan wrth gefnogi lles meddyliol cadarnhaol ac annog cymorth cynnar. Trwy’r ymrwymiad hwn, bydd y cyngor yn parhau i hyrwyddo adnoddau a chyfleoedd sy’n helpu cydweithwyr a phreswylwyr i ofalu am eu hiechyd meddwl a chefnogi eraill i wneud yr un peth.

I gael rhagor o wybodaeth am y gefnogaeth sydd ar gael trwy Melo, ewch i www.melo.cymru/cy/