Mae Cyngor Sir Fynwy yn cynnig rhaglen i rieni, i rieni a gofalwyr plant sy’n awtistig neu sy’n mynd trwy’r broses ddiagnostig ar hyn o bryd.

Mae EarlyBird Plus yn rhaglen sydd wedi’i thrwyddedu gan Gymdeithas Genedlaethol Awtistiaeth i rieni a gofalwyr plant rhwng 4 a 10 oed. Mae’r rhaglen yn rhad ac am ddim ac wedi’i goleuo gan dystiolaeth, ac mae’n helpu teuluoedd i ddeall plant ag awtistiaeth, a’u cefnogi, yn well.

Mae’n cael ei chyflwyno gan Wasanaeth Seicoleg Addysg Sir Fynwy a’n Hathro Ymgynghorol Anghenion Dysgu Ychwanegol ar gyfer y Blynyddoedd Cynnar, ac mae pob un ohonynt wedi’u hyfforddi gan ganolfan EarlyBird Cymdeithas Genedlaethol Awtistiaeth.

Mae’r rhaglen yn cynnwys chwe sesiwn, a’i nod yw rhoi dealltwriaeth well i rieni a gofalwyr am awtistiaeth, cyfathrebu, profiadau awtistig, llesiant, rhyngweithio cymdeithasol a chefnogi bywyd bob dydd. Mae hefyd yn rhoi cyfle i deuluoedd gwrdd â rhieni eraill mewn sefyllfaoedd tebyg, rhannu profiadau ac adeiladu rhwydweithiau cefnogol.

Lle y bo’n bosibl, gwahoddir aelod o staff yr ysgol hefyd i gymryd rhan, gan helpu i sicrhau cysondeb rhwng y cartref a’r ysgol.

Ar hyn o bryd mae sesiynau wedi’u cynllunio ar gyfer y cyfnodau canlynol:

· 9 Hydref tan 19 Tachwedd – rhaglen wyneb yn wyneb yn Neuadd y Sir, Brynbuga, sy’n rhedeg ar fore dydd Iau (dim sesiwn yn ystod hanner tymor)

· 11 Mai tan 22 Mehefin 2027 – rhaglen ar-lein ar fore dydd Mawrth (dim sesiwn yn ystod hanner tymor)

Mae’r rhaglen wedi bod yn rhedeg yn llwyddiannus yn Sir Fynwy ers nifer o flynyddoedd ac mae’r adborth gan rieni a staff yr ysgolion wedi bod yn gadarnhaol dros ben. Mae rhieni wedi ei disgrifio fel “rhaglen amhrisiadwy er mwyn deall awtistiaeth” ac wedi tynnu sylw at fanteision dod i gyswllt â theuluoedd eraill sy’n wynebu profiadau tebyg.

Mae staff yr ysgolion hefyd wedi disgrifio sut mae’r wybodaeth a gafwyd yn cael ei rhoi ar waith i gefnogi plant.

Meddai Aelod Cabinet Cyngor Sir Fynwy dros Addysg, y Cynghorydd Laura Wright: “Mae’r rhaglen hon yn ffordd amhrisiadwy i rieni a gofalwyr gael cefnogaeth a dealltwriaeth ar gyfer awtistiaeth.

“Buaswn i’n annog pob rhiant a gofalwr sy’n gymwys i gael rhagor o wybodaeth ac i alw draw.” Am ragor o wybodaeth, anfonwch neges trwy e-bost i aln@monmouthshire.gov.uk neu ffoniwch 01633 644412.