Mae Cyngor Sir Fynwy wedi ymrwymo i symud cynllun yn ei flaen i gwblhau darn hanfodol o ffordd sy’n cysylltu Magwyr â’r ardal ehangach.

Daw’r ymrwymiad yn dilyn cynnig a gyflwynwyd i’r cyngor yn galw am gamau brys i gwblhau’r rhan olaf o’r ffordd stad sy’n cysylltu datblygiad Rockfield Farm â Vinegar Hill.

Wrth ymateb i’r cynnig, dywedodd Aelod Cabinet Cyngor Sir Fynwy dros Adnoddau, y Cynghorydd Ben Callard: “Rydym yn gwybod pa mor bwysig yw hi i bobl deimlo’n gysylltiedig, nid yn unig drwy ffyrdd ond hefyd fel rhan o gymuned. Bydd cwblhau’r rhan olaf hon yn gwneud gwahaniaeth ymarferol gwirioneddol i breswylwyr ym Magwyr, gan wneud teithiau bob dydd yn haws a dod â gwahanol rannau o’r ardal ynghyd.

“Rydym hefyd yn cydnabod y rhwystredigaeth y gallai’r oedi hwn fod wedi ei achosi, ac rydym wedi ymrwymo i’w unioni, gan hefyd ddysgu o’r sefyllfa i wella sut rydym yn cyflawni datblygiadau yn y dyfodol. Bydd gorffen y ffordd yn fuddiol i drigolion ac i’r ardal ehangach, gan gefnogi cyfleoedd yn y dyfodol a helpu’r gymuned hon i ffynnu.”

Er bod llawer o’r datblygiad bellach wedi’i gwblhau, mae un darn pwysig o’r ffordd yn parhau heb ei gwblhau. Cydnabuwyd gan yr aelodau’r effaith y mae hyn wedi’i chael ar deithiau lleol a’r rhwydwaith ffyrdd ehangach.

Mae cynnydd sylweddol eisoes wedi’i wneud, gan gynnwys parhad y ffordd a ddarparwyd gan Gymdeithas Tai Sir Fynwy fel rhan o’i ddatblygiad tai diweddar. Mae’r darn sy’n weddill ar dir sy’n eiddo i’r cyngor, gyda chaniatâd cynllunio ar gyfer defnydd cyflogaeth yn y dyfodol.

Bydd y Cynghorydd Callard bellach yn cyflwyno cynigion i’r Cabinet i adeiladu’r darn olaf hwn, gan helpu i agor y safle’n llawn a chryfhau’r cysylltiadau i breswylwyr a busnesau.