Mae Cyngor Sir Fynwy wedi cael ei ganmol gan Estyn am y gwahaniaeth cadarnhaol y mae’n ei wneud i blant a phobl ifanc ledled y sir.

Dywedodd y Cyng. Laura Wright, Aelod Cabinet dros Addysg: “Mae hwn yn adborth gwych ac yn glod gwirioneddol i’n hysgolion, ein gwasanaethau a’n pobl ifanc. Mae canfyddiadau Estyn yn dangos bod ein dull cynhwysol, sy’n seiliedig ar werthoedd, yn gweithio. O’r blynyddoedd cynnar ymlaen, rydym yn canolbwyntio ar helpu pob plentyn a pherson ifanc i deimlo eu bod yn ddiogel, yn cael eu cefnogi ac yn gallu ffynnu. Rwyf am ddiolch i’n holl staff addysg ledled Sir Fynwy am eu hymroddiad a’u rôl hanfodol wrth helpu plant a phobl ifanc i lwyddo.”

Mae’r ganmoliaeth yn dilyn arolygiad gan Estyn ym mis Tachwedd 2025. Tynnodd arolygwyr sylw at arweinyddiaeth gref, gweledigaeth glir wedi’i hadeiladu ar degwch, agwedd agored a charedigrwydd a pherthnasoedd cadarnhaol ar draws ysgolion a gwasanaethau.

Tynnwyd sylw at raglen Awtistiaeth mewn Ysgolion a Lleoliadau Sir Fynwy (MASS) fel maes arfer rhagorol. Mae MASS yn deall awtistiaeth fel gwahaniaeth, nid diffyg. Mae’n arfer dull sy’n seiliedig ar gryfderau, gan hyrwyddo dealltwriaeth a dathlu potensial a chyflawniadau pob unigolyn. Mae Hyrwyddwyr Awtistiaeth ym mhob ysgol yn parhau i’n helpu i ddatblygu a gwella’r ffordd yr ydym yn cefnogi ein dysgwyr ag awtistiaeth.

Canmolodd Estyn hefyd ymagwedd gynhwysol Sir Fynwy at Anghenion Dysgu Ychwanegol (ADY). Mae hyn wedi gwella’n sylweddol ers yr arolygiad diwethaf yn 2020 ac mae’n helpu mwy o ddysgwyr i aros mewn ysgolion prif ffrwd yn eu cymunedau eu hunain, gyda chefnogaeth gynnar a dull sy’n canolbwyntio ar y person.

Mae Gwasanaeth Ieuenctid y cyngor hefyd wedi derbyn canmoliaeth gref am ei waith cynhwysol ac arloesol sy’n cefnogi hyder, gwytnwch a sgiliau bywyd pobl ifanc. Cafodd Llais Ieuenctid argraff arbennig ar arolygwyr, gan gynnwys y bleidlais “Gwnewch Eich Marc”, lle cymerodd bron i dri chwarter o bobl ifanc 11-18 oed ran yn 2025. Tynnwyd sylw gan Estyn at dri o brosiectau’r Gwasanaeth Ieuenctid am eu rhagoriaeth mewn cefnogaeth, cyfranogiad a chynllunio iechyd meddwl.

Disgrifiwyd diogelu hefyd fel cryfder clir ar draws y bwrdd, gyda systemau effeithiol ar waith i nodi ac ymateb i risgiau sy’n dod i’r amlwg. Rhoddwyd clod i fodel Tîm o Amgylch yr Ysgol (TAY) hefyd am ymyrryd yn gynnar a helpu i gyflawni gwelliannau parhaol.