Mae Cyngor Sir Fynwy wedi lansio ymgynghoriad cyhoeddus newydd i gasglu sylwadau ar ei ddrafft Strategaeth Rheoli Risg Llifogydd Lleol.

Mae’r ddrafft strategaeth yn nodi sut mae’r cyngor yn rheoli risg llifogydd o ddŵr wyneb, dŵr wyneb, dŵr daear a chyrsiau dŵr cyffredin.

Mae’r ymgynghoriad, sydd ar gael ar Sgwrsio am Sir Fynwy, llwyfan ymgysylltu y cyngor, yn gwahodd preswylwyr, busnesau a rhanddeiliaid i helpu llunio ymagwedd y sir at reoli risg llifogydd lleol.

Cyhoeddwyd Strategaeth Rheoli Risg Llifogydd Lleol (Strategaeth Leol) gyntaf y cyngor yn 2013, sy’n nodi ein ymagwedd gyffredinol at reoli risg llifogydd lleol. Ynghyd â’n Strategaeth Leol, cyhoeddodd Cyngor Sir Fynwy Gynllun Rheoli Risg Llifogydd yn 2016.

Ers cyhoeddi’r dogfennau allweddol hyn, mae Llywodraeth Cymru wedi diweddaru ei Strategaeth Genedlaethol ar Reoli Risg Llifogydd ac Erydiad Arfordirol. Mae deddfwriaeth newydd a llifogydd sylweddol wedi rhoi gwybodaeth bellach ar gyfer ein dealltwriaeth o risgiau lleol. Mewn ymateb, mae’r cyngor wedi llunio Strategaeth Leol ddiwygiedig i reoli llifogydd dŵr wyneb, dŵr daear a chyrsiau dŵr cyffredin dros y chwe mlynedd nesaf.

Dyma’ch cyfle i rannu eich sylwadau. Ymwelwch â Sgwrsio am Sir Fynwy cyn dydd Gwener, 26 Medi 2025, i adolygu’r strategaeth arfaethedig a llenwi arolwg byr i rannu eich gwybodaeth leol a syniadau ar sut y gall y cyngor gefnogi cymunedau, seilwaith a’r amgylchedd naturiol rhag risgiau llifogydd yn y dyfodol.

Gallwch lenwi’r arolwg yma: www.sgwrsioamsirfynwy.co.uk/rheoli-risg-llifogydd-lleol-yn-sir-fynwy neu ymweld â’ch hyb cymunedol lleol i gael copi papur.

Dywedodd y Cyng Catrin Maby, Aelod Cabinet dros Newid Hinsawdd a’r Amgylchedd: “Gwyddom y gall llifogydd gael effeithiau trychinebus ar fywyd a bywoliaeth pobl. Mae’r ymgynghoriad hwn yn gam hanfodol i sicrhau fod ein strategaeth risg llifogydd yn adlewyrchu anghenion a phrofiadau ein cymunedau. Rydym eisiau clywed gan gynifer o bobl ag sydd modd.”

Hoffech chi drafod y ddrafft strategaeth gyda swyddogion? Byddwn yn cynnal sesiynau galw heibio ym mis Awst a mis Medi. Mae gwybodaeth ar leoliadau, dyddiadau ac amserau ar gael yma: https://www.sgwrsioamsirfynwy.co.uk/rheoli-risg-llifogydd-lleol-yn-sir-fynwy