Mae Cyngor Sir Fynwy wedi lansio cyfres o ffilmiau byr ar ei sianeli cyfryngau cymdeithasol ac ar ei wefan i gyflwyno ei Arweinydd a Chabinet newydd i breswylwyr y Sir.

Mae ffilmiau ‘Cwrdd â’r Cabinet yn rhoi sylw i safleoedd lleol sy’n berthnasol i Wardiau a chyfrifoldebau yr Aelodau Cabinet perthnasol, yn cynnwys Castell Cil-y-coed, glan yr afon yng Nghas-gwent, y Fenni, Llanelli Hill a Threfynwy, ac yn codi cwr y llen ar gefndir, ethos, blaenoriaethau a nodau’r aelodau newydd.

Ers yr etholiad ym mis Mai, bu Aelodau’r Cabinet yn mynd o amgylch yn ymweld â safleoedd allweddol yn eu maes cyfrifoldeb, gan gwrdd â’r rhai sy’n gysylltiedig a’r gymuned mewn ystyr ehangach, ar draws y sir. Roeddent hefyd yn bresennol yn Sioe Brynbuga a gynhaliwyd yn ddiweddar gan gwrdd gydag ymwelwyr ym mhabell y Cyngor.

Yn y gyntaf o’r wyth ffilm, ymwelodd y Cynghorydd Sir Mary Ann Brocklesby, y fenyw gyntaf i fod yn Arweinydd Cyngor Sir Fynwy â’r Neuadd Llesiant yn Llanelli Hill a dywedodd: “Yr hyn rwyf eisiau ei weld yn y pum mlynedd nesaf yw Sir Fynwy lewyrchus. Sir mae pawb yn teimlo fod ganddynt le ynddi. Eu bod yn cael eu parchu. Fod ganddynt gartref y maent yn teimlo’n ddiogel ynddo. Eu bod yn teimlo’n rhan o gymuned ac wedi cysylltu gyda phobl eraill, ac mai dyma’r lle y gallant ffynnu ynddo yn y dyfodol oherwydd y caiff yr amgylchedd ei warchod gennym ni a gyda ni.”

Hefyd dywedodd Arweinydd y Cyngor, sy’n ymroddedig i fynd i’r afael â diffyg cydraddoldeb a hyrwyddo cynhwysiant: “Byddaf yn gwneud popeth a fedraf i sicrhau na chaiff neb ei adael ar ôl yn Sir Fynwy ac y caiff llais pawb ohonom ei glywed.”

Aelodau Cabinet Cyngor Sir Fynwy yw:

Arweinydd – Cyng. Mary Ann Brocklesby

Dirprwy Arweinydd ac Aelod Cabinet dros Economi Cynaliadwy – Cyng. Paul Griffiths

Aelod Cabinet dros Gydraddoldeb ac Ymgysylltu – Cyng. Catherine Fookes

Aelod Cabinet dros Addysg – Cyng. Martin Groucutt

Aelod Cabinet dros Adnoddau – Cyng. Rachel Garrick

Aelod Cabinet dros Ofal Cymdeithasol, Diogelu ac Iechyd Hygyrch – Cyng. Tudor Thomas

Aelod Cabinet dros Newid Hinsawdd a’r Amgylchedd – Cyng. Catrin Maby

Aelod Cabinet dros Gymunedau Cynhwysol ac Egnïol – Cyng. Sara Burch

Gellir gweld yr holl ffilmiau, sy’n cynnwys pob Aelod o Gabinet Cyngor Sir Fynwy, ar ei wefan yn monmouthshire.gov.uk/cy/cwrdd-ar-cabinet/ neu gellir darllen y diweddaraf ar y sianeli cyfryngau cymdeithasol (Facebook, Twitter ac Instagram) drwy @MonmouthshireCC