Cynhaliodd Cyngor Sir Fynwy seremoni fer ond deimladwy iawn yn Neuadd y Sir yr wythnos ddiwethaf i nodi Diwrnod Cofio’r Holocost 2026.

Roedd y seremoni’n gyfle i gofio, i fyfyrio ac i anrhydeddu’r chwe miliwn o ddynion, menywod a phlant Iddewig a lofruddiwyd yn yr Holocost, a’r miliynau o bobl eraill a erlynwyd ac a laddwyd mewn hil-laddiadau ar ôl hynny ar draws y byd.

Fe fu Cadeirydd y Cyngor, y Cynghorydd Peter Strong, yn darllen y gerdd Belsen Silence ac arweiniwyd gweddïau gan y Cynghorydd Malcolm Lane.

Darllenwyd stori bwerus dioddefwr gan Arweinydd y Cyngor, y Cynghorydd Mary Ann Brocklesby.

Ymunodd swyddogion y Cyngor ag aelodau etholedig ar gyfer munud o dawelwch.

Y thema eleni yw Pontio Cenedlaethau. Mae hyn yn ein hatgoffa am y cyfrifoldeb yr ydym yn ei rannu i gario’r atgofion ymlaen — i wrando, i ddysgu ac i sicrhau na fydd lleisiau goroeswyr yn cael eu hanghofio.

Meddai’r Cynghorydd Angela Sandles, Aelod o Gabinet Cyngor Sir Fynwy dros Gydraddoldeb ac Ymgysylltu: “Un o’r pethau mwyaf pwerus am Ddiwrnod Cofio’r Holocost yw ei fod yn cysylltu pobl sydd ddim wedi cwrdd erioed, ar draws ffiniau amser a chenedlaethau.

“Nid yw un ohonom ni sydd yma heddiw wedi gweld y gwersylloedd, wedi byw trwy’r ofn, wedi colli aelodau o’r teulu yn y ffordd a ddigwyddodd i gymaint o bobl. Ac eto, mae’r digwyddiadau hyn yn dal i siapio’r byd yr ydyn ni’n byw ynddo, a’n cyfrifoldeb tuag at ein gilydd.

“Dyna wir ystyr Pontio Cenedlaethau. Am flynyddoedd lawer, roedd goroeswyr yn gallu siarad yn uniongyrchol ag ysgolion, cymunedau a chyrff cyhoeddus. Wrth i’r lleisiau hynny fynd yn llai ac yn llai, mae’r awenau’n dod i’n dwylo ni.

“Yn llawer o’n rolau ni bob dydd rydyn ni’n gweld mor bwysig yw creu lleoedd ble mae pobl yn teimlo eu bod yn perthyn, ble mae gwahaniaethau’n cael eu parchu a ble mae pawb yn cael eu trin ag urddas. “Mae cofio yn gyfrifoldeb. Mae sicrhau bod y straeon hyn yn parhau yn dod â gobaith.”