Mae gwaith wedi dechrau’n swyddogol ar ganolfan gymunedol newydd fodern gwerth £2.9m, sydd wedi’i glustnodi ar gyfer cymunedau Magwyr a Gwndy. Ddydd Mawrth 24ain Ionawr, ymgasglodd cynrychiolwyr o Gyngor Sir Fynwy, Kier Construction ac aelodau o grŵp Hyb Cymunedol Magwyr a Gwndy ar y safle’r ‘Three Fields’ ym Magwyr ar gyfer y seremoni torri tir swyddogol ar y safle.
Mae’r seremoni’n garreg filltir arwyddocaol i’r prosiect, sydd wedi bod ar y gweill ers sawl blwyddyn. Ar ôl ei agor, bydd gan y cyfleuster ganolfan aml-ddefnydd modern a chynaliadwy sydd wedi’i chynllunio ar gyfer gweithgareddau cymdeithasol, diwylliant, hamdden, chwaraeon a gweithgareddau cymunedol eraill. Bydd y safle’n cynnig gofodau at ddefnydd cymunedol a digwyddiadau masnachol, yn ogystal â photensial ar gyfer twf busnesau bach. Bwriad yr adeilad yw cwrdd â Safonau ‘Rhagorol’ BREEAM. Bydd hyn yn cynnwys mabwysiadu dyluniad ‘gwyrdd’ carbon isel yn seiliedig ar barhauster a gwydnwch, gan gynnwys atebion sy’n defnyddio ynni’n effeithlon fel paneli ynni haul a phympiau gwres ffynhonnell aer.Bydd yr hyb newydd, sydd wedi’i leoli (ar safle’r ‘Three Fields’) ger y B4245, hefyd yn cynnig rhyngwyneb gyda’r orsaf gerdded Magwyr a Gwndy arfaethedig.
Ffrwyth y datblygiad yw ymdrechion cyfunol Cyngor Sir Fynwy a grŵp Hyb Cymunedol Magwyr a Gwndy, sydd wedi cydweithio ar y cysyniad a sicrhau cyllid ers i’r cynllun gael ei adfywio yn 2009 (cyfranogiad grŵp Hyb Cymunedol Magwyr a Gwndy ers 2016). Cyllidir y cynllun gan gyfuniad o Arian Ysgogiad Economaidd Llywodraeth Cymru, cyfraniadau hamdden i oedolion A106 o ddatblygiadau cyfagos, a grant gan gronfa’r ‘Loteri Fawr’. Ar ôl ei gwblhau, bydd grŵp Hyb Cymunedol Magwyr a Gwndy yn meddiannu ac yn rheoli’r ganolfan gymunedol arfaethedig ar gyfer hyrwyddo defnydd cymunedol yn uniongyrchol. Mae grŵp Hyb Cymunedol Magwyr a Gwndy ar hyn o bryd yn rheoli’r eiddo presennol ym Magwyr a’r ardal gyfagos, gan gynnwys Neuadd Goffa Gwndy, a bydd y safle hwn yn fforddio gwell cysylltedd a chyhoeddusrwydd y cynigion lleol.
Dywedodd y Cynghorydd Mary Ann Brocklesby, Arweinydd Cyngor Sir Fynwy: “Mae’r prosiect hir-ddisgwyliedig hwn wedi bod yn flynyddoedd i’w wneud ac mae’n benllanw gwaith caled a phenderfyniad y grŵp Hyb Cymunedol Magwyr a Gwndy a swyddogion Cyngor Sir Fynwy. Mae gweld y prosiect hwn yn dechrau dod at ei gilydd yn dyst i ysbryd cymunedol a dyfalbarhad y grŵp yn ogystal ag ymdrechion cyfun y grŵp a’r Cyngor. Ymgorfforiad yr ysbryd o gymuned yw’r fenter hon a bydd yn eistedd wrth galon y ddau bentref gwych hyn, gan ddarparu gofod lle gall pob cenhedlaeth ddod at ei gilydd. Mae’n ddiolch enfawr i bawb sydd wedi helpu i gael y prosiect i’r pwynt hwn ac ni allaf aros i agor y drysau’n swyddogol yn ddiweddarach eleni.”
Dechreuodd Kier, y grŵp gwasanaethau seilwaith, adeiladu ac eiddo blaenllaw yn y DU, ar y gwaith tir yn hwyr yn 2022 gyda’r gwaith adeiladu’n mynd rhagddo’n dda, ac mae’r gwaith o godi’r ffrâm ddur a’r slab concrit bellach wedi’i gwblhau. Mae disgwyl i’r prosiect gael ei gwblhau erbyn mis Awst 2023.
Dywedodd Ian Rees, Rheolwr Ardal Kier Western & Wales: “Bydd y ganolfan gymunedol newydd yn darparu cyfleuster y mae mawr ei angen ar gyfer y rhai sy’n byw ym Magwyr a Gwndy, felly mae marcio carreg filltir mor bwysig yn wych.
“Rydym yn falch o gefnogi mentrau lleol ledled y byd adeiladu ac mae Kier eisoes wedi cynnal ymweliadau safle i ysgolion yn y gymuned, gan ysbrydoli’r genhedlaeth nesaf o weithwyr proffesiynol ym maes adeiladu. Rydym yn edrych ymlaen at gynnal digwyddiadau pellach dros y misoedd nesaf.”
Meddai Paul Turner, Ymddiriedolwr a Chadeirydd Grŵp Hyb Cymunedol Magwyr a Gwndy: “Rydw i a’r grŵp yn falch o weld adeiladu’r Hyb yn mynd mor dda ac yn edrych ymlaen at ei agor yn ddiweddarach yn y flwyddyn. Mae wedi bod yn bleser gweithio gyda chynghorwyr a swyddogion Cyngor Sir Fynwy a’r Loteri i wneud ei hadeiladu’n bosib. Mae wedi bod yn amser hir yn dod ond rydym yn sicr y bydd yn gyfleuster gwych y bydd trigolion yn ei werthfawrogi’n fawr.”
Mae’r grŵp yn awyddus i glywed gan unrhyw un a allai fod eisiau cynnal grwpiau neu ddosbarthiadau cymdeithasol/hamdden, neu unrhyw un a allai weld cyfle busnes yn yr hyb newydd. I drafod cyfleoedd posib, cysylltwch â’r grŵp ar magorandundyhub@gmail.com