Bu gofalwyr sy’n gofalu am anwyliaid neu gyfeillion yn rhannu eu profiadau personol gyda Chyngor Sir Fynwy ar ddechrau Wythnos Gofalwyr 2020. Nod yr ymgyrch flynyddol, sy’n rhedeg rhwng 8 – 14 Mehefin, yw codi ymwybyddiaeth o ofalu, rhoi sylw i’r heriau sy’n wynebu gofalwyr di-dâl a chydnabod eu cyfraniad i deuluoedd a chymunedau ar draws y sir.

Mae thema eleni – ‘gwneud gofalu yn weladwy’ – yn gobeithio tynnu sylw at y miloedd o arwyr tawel ar draws y wlad nad ydynt yn aml yn cael eu cydnabod am eu gwaith. Mae’r ymgyrch hefyd yn anelu i helpu pobl nad ydynt yn meddwl am eu hunain fel bod â chyfrifoldebau gofalu i uniaethu fel gofalwyr a chael mynediad i gymorth sydd ei fawr angen.

I helpu codi ymwybyddiaeth o ofalwyr di-dâl bu Angela Harris, sy’n gofalu am ei thad 92 oed, yn rhannu ei phrofiad o ofalu yn ystod y pandemig a’r heriau a ddaeth yn sgil hynny. Dywedodd: “Mae’r pandemig wedi effeithio ar bawb ohonom. Mae fy nhad yn ei chael yn anodd peidio mynd allan ond rydym wedi esbonio iddo fod yn rhaid iddo aros i mewn, mae’n rhaid i ni fod yn ddiogel. Ar hyn o bryd rydym yn cymryd pethau un dydd ar y tro.”

Mae’r Wythnos Gofalwyr yn aml yn uchafbwynt y flwyddyn ar gyfer Prosiect Gofalwyr Sir Fynwy, gyda’r tîm yn cynnig rhaglen lawn o ddigwyddiadau. Gwelodd 2020 y tîm yn meddwl tu allan i’r blwch oherwydd y pandemig presennol ac mae’r tîm wedi llunio digwyddiadau a hyfforddiant rhithiol ar gyfer gofalwyr yn cynnwys boreau coffi rhithiol i helpu gadw pobl mewn cysylltiad.

Mae Prosiect Gofalwyr Sir Fynwy hefyd yn defnyddio’r wythnos i roi sylw i’r gefnogaeth sydd ar gael i ofalwyr. Maent yn galw ar unrhyw ofalwr a allai fod angen help neu gyngor i gysylltu â nhw. Mae’r gefnogaeth sydd ar gael yn cynnwys mynediad i weithwyr cymdeithasol, nyrsys cymunedol, ffisiotherapyddion a therapyddion galwedigaethol a’r tîm ail-alluogi.

Dywedodd y Cyng Penny Jones, Aelod Cabinet dros Wasanaethau Cymdeithasol, Iechyd a Diogelu: “Hoffwn fanteisio ar y cyfle hwn i gydnabod gwaith cynifer o ofalwyr gwych ar draws Sir Fynwy. Pa bynnag fath o ofalu a wnewch, p’un ai’n gofalu am aelod o’r teulu neu edrych ar ôl ffrind, rydych yn gwneud gwahaniaeth go iawn i’w bywydau. Mae’r wythnos hon i gyd amdanoch chi a chanmol eich gwaith gwych. Diolch i chi!”

Gofynnir i unrhyw ofalwr sy’n dymuno cymryd rhan a rhoi cynnig ar rai o’r cyfleoedd hyn yn defnyddio technoleg ddigidol i gofrestru gyda’r tîm.

E-bost Tracey Davies – Cydlynydd Gofalwyr – tracey.davies@gavo.org.uk neu ffonio 01291 675474