mathau o faethu

Mae gofal maeth tymor byr yn gallu golygu darparu gofal dros dro i blant yn Sir Fynwy am ychydig ddyddiau, wythnosau neu fisoedd wrth i’r cynlluniau ar gyfer eu dyfodol gael au cadarnhau.

Er gwaethaf y cyfnod byr hwn, gallwch chi wneud gwahaniaeth mawr i fywyd plentyn. Mae gofalwyr maeth tymor byr yn Sir Fynwy nid yn unig yn darparu amgylchedd diogel a chefnogol am gyfnod, ond maen nhw hefyd yn gweithio’n agos gyda’n tîm i ddiffinio’r daith tuag at y tymor hir i’r plentyn: at ei deulu, at deulu maeth arall neu i gael ei fabwysiadu.

Mae gofal maeth tymor hir yn gallu golygu bod plentyn neu berson ifanc yn aros gyda gofalwr maeth nes y bydd yn oedolyn, yn gadael gofal a thu hwnt. Felly, yn hytrach na lleoliad tymor hir, rydyn ni’n hoffi meddwl am y daith fel ymuno â chartref newydd.

Mae gofal tymor hir yn cael ei gynnig i blant sydd ddim yn gallu byw gartref gyda theulu ac mae’n cynnig dewis sefydlog a diogel gyda sefydlogrwydd. Mae’n golygu bod gan y plentyn deulu maeth sefydlog am oes.

Rydyn ni i gyd yn haeddu seibiant weithiau. Mae seibiant byr neu seibiant yn gyfle i blant gael rhywfaint o amser oddi wrth eu teulu.

Mae seibiant byr (sydd weithiau’n cael ei alw’n ‘ofal cymorth’ neu’n ‘seibiant’) yn gallu golygu cymryd plentyn i mewn am noson, am benwythnos neu am wythnos neu ddwy, yn aml yn rheolaidd.

Mae darparwyr seibiant byr yn estyniad i deulu’r plentyn, yn cynnig seibiant o fywyd bob dydd ac yn darparu cefnogaeth pan fydd ei hangen fwyaf.

Weithiau, mae angen help ar y rhiant a’r plentyn. Mae lleoliadau i rieni a phlant yn ei gwneud yn bosibl rhannu cefnogaeth a helpu rhieni sydd mewn angen i ddysgu gan rywun sydd â phrofiad. Mae hyn yn aml yn golygu helpu rhieni i ddysgu sut i ofalu am eu plentyn yn ddiogel mewn amgylchedd cefnogol a diogel.

Mae’n rôl ddeuol: nid dim ond meithrin y genhedlaeth nesaf sy’n bwysig, ond eu helpu i deimlo eu bod nhw’n gallu gwneud yr un peth.

Weithiau, mae angen gwahanol fathau o ofal ar blant sydd ag anghenion emosiynol neu ymddygiadol ychwanegol. Dyma rôl lleoliadau therapiwtig. Mae cefnogaeth ehangach ar gael i ofalwyr therapiwtig a’u plant, i helpu gyda’r holl agweddau unigryw ar ofal y plentyn.

Yn Sir Fynwy, mae hyn yn cael ei gefnogi gan bartneriaeth aml-asiantaeth, MyST (Fy Nhîm Cymorth). Dyma clip byr o rai o’n gofalwyr maeth. Gael gwybod mwy: https://www.mysupportteam.org.uk/cy/maethu-therapiwtig/

Mae llawer o ffoaduriaid ifanc yn gorfod gadael eu teulu cariadus ar eu hôl i ddianc rhag rhyfel, trais a gormes gyda’r gobaith o gael bywyd gwell. Gyda chymorth eich awdurdod lleol, gallwch arwain ffoadur ifanc i gael mynediad at y cymorth sydd ei angen arnynt.

Mae ffoaduriaid ifanc sy’n cyrraedd Cymru yn chwilio am ddiogelwch, dealltwriaeth, cefnogaeth, llety ac arweiniad. Mae llawer o ofalwyr maeth awdurdodau lleol eisoes yn darparu cymorth hanfodol, ond mae angen mwy i fynd i’r afael â’r argyfwng parhaus.

Gall gofalu am blentyn ag anabledd fod yn feichus iawn ar rieni. Gall maethu seibiannau byr roi rhywfaint o amser iddynt eu hunain neu amser i’w dreulio gyda’u plant eraill ac aelodau o’r teulu.

Daw seibiannau byr mewn llawer o wahanol ffurfiau a gallant bara unrhyw beth o ychydig oriau i ddiwrnodau. Mae gofalwyr maeth seibiant i blant ag anableddau yn cael lwfans ariannol a chymorth parhaus, felly dydych chi byth ar eich pen eich hun.

Gallech helpu person ifanc 16-21 oed drwy ddarparu pont rhwng gofal a byw’n annibynnol. Byddech yn cefnogi’r person ifanc mewn ffordd debyg i letywr. Ni fyddech yn cael eich cofrestru fel gofalwr maeth a byddwch yn cael eich asesu’n wahanol.

Byddech yn cynnig ystafell wely sbâr iddo ond hefyd yn ei helpu i fynychu addysg a chwilio am swydd neu hyfforddiant a chyda sgiliau bywyd fel coginio a chyllidebu. Mae llety â chymorth yn ffordd wych o ddechrau gofalu am bobl ifanc, ochr yn ochr â’ch ymrwymiadau eraill.